(اُردو ایکسپریس) اتر پردیش کے ضلع امروہہ میں ایک افسوسناک واقعہ پیش آیا، جہاں 36 سالہ خاتون نے اپنی پالتو بلی کی موت کے بعد صدمے میں آ کر خودکشی کر لی۔
رپورٹس کے مطابق، خاتون نے تین دن تک بلی کو اپنے پاس رکھا اور اسے دفنانے سے انکار کرتی رہیں، اس امید میں کہ وہ دوبارہ زندہ ہو جائے گی۔ گھر والوں نے انہیں سمجھانے کی کوشش کی، مگر وہ خاموش رہیں۔ آخرکار، انہوں نے گلے میں پھندا ڈال کر اپنی زندگی کا خاتمہ کر لیا۔
اہل خانہ کا کہنا ہے کہ خاتون اپنی بلی ’ٹیٹو‘ سے بے حد محبت کرتی تھیں اور اسے اپنے بچے کی طرح پالا تھا۔ ماہرین نفسیات کے مطابق، وہ ممکنہ طور پر ایک ذہنی بیماری کا شکار تھیں، جس کی وجہ سے وہ حقیقت اور تصور میں فرق کرنے سے قاصر تھیں۔
اس افسوسناک واقعے کے بعد اہل خانہ نے فیصلہ کیا ہے کہ وہ آئندہ کبھی پالتو جانور نہیں رکھیں گے۔ خاتون کی موت کے بعد پولیس کی موجودگی میں بلی کو دفنا دیا گیا۔
