(اُردو ایکسپریس) لاہور کی ایک مقامی عدالت نے معروف اداکارہ نازش جہانگیر اور ان کے ساتھی سکندر خان کے خلاف امانت میں خیانت، فراڈ اور دھمکیاں دینے کے الزامات کے تحت ناقابلِ ضمانت وارنٹ گرفتاری جاری کیے ہیں۔ عدالت نے پولیس کو حکم دیا ہے کہ ملزمان کو 22 مارچ 2025 کو گرفتار کر کے پیش کیا جائے۔
یہ مقدمہ اسود ہارون نامی شخص کی شکایت پر درج کیا گیا ہے، جنہوں نے الزام عائد کیا ہے کہ نازش جہانگیر اور سکندر خان نے شوبز انڈسٹری میں مواقع فراہم کرنے کا جھانسہ دے کر ان سے لاکھوں روپے اور قیمتی گاڑی ہتھیا لی۔ اپنی رقم اور گاڑی کی واپسی کے مطالبے پر انہیں ایک فارم ہاؤس میں بلایا گیا، جہاں مسلح افراد نے انہیں تشدد کا نشانہ بنایا اور سنگین نتائج کی دھمکیاں دیں۔
عدالت نے پولیس کو ہدایت کی ہے کہ ملزمان کو گرفتار کر کے 22 مارچ کو عدالت میں پیش کیا جائے۔
تاحال، نازش جہانگیر کی جانب سے اس معاملے پر کوئی بیان سامنے نہیں آیا ہے۔
