(اردو ایکسپریس) زیارت کے علاقے مانگی ڈیم فیز تھری میں دہشت گرد حملے میں شہید ہونے والے 21 پولیس اہلکاروں کی میتوں کو لے کر لواحقین اور مظاہرین نے شدید احتجاج کیا ہے۔ مظاہرین میتوں کو سول اسپتال کوئٹہ سے اپنے قبضے میں لے کر ہنہ اوڑک ائیرپورٹ روڈ پر جاری دھرنے کے مقام پر منتقل کر چکے ہیں، جس کے بعد اسپتال میں شدید کشیدگی اور افراتفری دیکھی گئی۔
مطالبات کی منظوری تک احتجاج جاری رہے گا دھرنے کے شرکاء نے اعلان کیا ہے کہ جب تک وزیراعظم پاکستان اور آرمی چیف سے براہِ راست مذاکرات نہیں ہوتے، اس وقت تک نہ صرف دھرنا جاری رہے گا بلکہ شہداء کی تدفین بھی نہیں کی جائے گی۔ مظاہرین کا کہنا ہے کہ وہ اپنے پیاروں کے خون کا انصاف چاہتے ہیں اور حکومت کو ان کے مطالبات ماننا ہوں گے۔ اس موقع پر پاکستان تحریک انصاف کے رکن قومی اسمبلی عادل بازئی اور پشتونخوا ملی عوامی پارٹی کے عبدالرحیم زیارتوال سمیت دیگر سیاسی رہنما بھی موجود تھے جنہوں نے ورثاء سے یکجہتی کا اظہار کیا۔
سول اسپتال میں کشیدگی اور سیکیورٹی پوسٹ مارٹم مکمل ہونے کے بعد میتوں کی حوالگی پر لواحقین میں غم و غصہ پایا گیا، جس کے بعد صورتحال کشیدہ ہو گئی۔ مظاہرین کی جانب سے نعرے بازی کی گئی اور اسپتال سے میتیں لے جانے کے دوران پولیس اور مظاہرین کے درمیان تلخ کلامی اور پتھراؤ کے واقعات بھی پیش آئے، جس میں کچھ پولیس اہلکاروں کے زخمی ہونے کی اطلاعات ہیں۔ انتظامیہ نے سیکیورٹی کو مزید سخت کر دیا ہے اور کوئٹہ کے متعدد راستے بند کر دیے گئے ہیں۔
پسِ منظر واضح رہے کہ گزشتہ روز زیارت میں ہونے والے دہشت گرد حملے میں دو ایس ایچ اوز سمیت متعدد اہلکار شہید ہوئے تھے۔ ابتدائی طور پر 9 شہداء کی تدفین ہو چکی ہے، جبکہ دیگر 21 شہداء کی میتیں پولیس لائنز میں نمازِ جنازہ کے لیے لائی جانی تھیں، تاہم لواحقین کے احتجاج نے پوری صورتحال کو بدل دیا ہے۔ دوسری جانب سیکیورٹی فورسز کا دعویٰ ہے کہ جوابی کارروائی میں 15 دہشت گرد ہلاک کیے جا چکے ہیں۔
سیاسی رہنماؤں نے وفاقی و صوبائی حکومت پر زور دیا ہے کہ فوری طور پر مداخلت کر کے لواحقین کے تحفظات دور کیے جائیں اور مسئلے کو پرامن طریقے سے حل کیا جائے۔
