(اُردو ایکسپریس) پاکستان تحریک انصاف (پی ٹی آئی) خیبرپختونخوا میں پیدا ہونے والے اندرونی اختلافات کو ختم کرنے اور نظم و ضبط برقرار رکھنے کے لیے ایک اہم فیصلہ کیا گیا ہے۔
پی ٹی آئی قیادت کی جانب سے جاری کردہ باقاعدہ اعلامیے کے مطابق اسد قیصر کی سربراہی میں ایک 6 رکنی اعلیٰ سطح کی کمیٹی تشکیل دے دی گئی ہے۔
اس کمیٹی میں خیبرپختونخوا اسمبلی کے اسپیکر بابر سلیم سواتی، علی اصغر خان، مینا خان، اکبر ایوب اور عاطف خان کو شامل کیا گیا ہے۔اعلامیے میں واضح کیا گیا ہے کہ یہ نو تشکیل شدہ کمیٹی پارلیمانی پارٹی اور صوبائی حکومت کے درمیان مضبوط کوآرڈینیشن کا اہم کردار ادا کرے گی، تاکہ حکومتی امور اور پارٹی فیصلوں میں ہم آہنگی پیدا کی جا سکے۔
اس کے علاوہ، یہ کمیٹی وزیر اعلیٰ خیبرپختونخوا سہیل آفریدی، پارٹی کے صوبائی صدر اور ‘تحریک تحفظِ آئین’ کے مابین ایک فعال مشاورتی فورم کے طور پر بھی کام کرے گی تاکہ تمام اہم سیاسی و انتظامی فیصلے باہمی مشاورت سے طے کیے جا سکیں۔
