(اردو ایکسپریس) فرانس کے شمال مشرقی علاقے ٹومبلین (Tomblaine) میں اسکائی ڈائیونگ کے لیے جانے والا ایک طیارہ گر کر تباہ ہوگیا، جس کے نتیجے میں پائلٹ سمیت تمام 11 افراد جاں بحق ہوگئے۔
مقامی حکام کے مطابق حادثہ اتوار کی صبح مقامی وقت کے مطابق تقریباً 11 بجے نینسی-ایسے (Nancy-Essey) ایئرڈروم کے قریب پیش آیا، جہاں طیارہ رن وے کے نزدیک گھاس والے علاقے میں گر کر تباہ ہوگیا۔
حکام نے بتایا کہ جاں بحق افراد میں ایک پائلٹ، پانچ تربیت حاصل کرنے والے اسکائی ڈائیورز (طلبہ) اور پانچ انسٹرکٹرز شامل ہیں۔ حادثے میں کوئی بھی زندہ نہیں بچ سکا۔
ٹومبلین کے میئر ہروے فیرون نے بتایا کہ طیارہ کسی رہائشی مکان سے نہیں ٹکرایا، جس کے باعث مزید جانی نقصان نہیں ہوا۔ ان کے مطابق پورا شہر اس المناک سانحے پر سوگوار ہے۔
عینی شاہدین نے بتایا کہ حادثے سے چند لمحے قبل طیارے کے انجن سے غیر معمولی آوازیں سنائی دیں، جس کے فوراً بعد زور دار دھماکے کی آواز آئی۔
ریسکیو اور امدادی ٹیمیں فوری طور پر جائے وقوعہ پر پہنچ گئیں، جبکہ پولیس نے عوام سے اپیل کی ہے کہ تحقیقات مکمل ہونے تک حادثے کے مقام سے دور رہیں۔
فرانسیسی حکام نے حادثے کی وجوہات جاننے کے لیے تکنیکی تحقیقات کا آغاز کر دیا ہے۔ فضائی حادثات کے ماہرین ملبے کا معائنہ کر رہے ہیں، جبکہ فرانسیسی وزیر داخلہ لوراں نونیز اور وزیر ٹرانسپورٹ فلپ تاباروٹ بھی جائے وقوعہ پہنچ گئے ہیں۔ حکام کے مطابق حادثے کی اصل وجہ تحقیقات مکمل ہونے کے بعد سامنے آئے گی۔
