(اُردو ایکسپریس)
امریکی ٹیکنالوجی کی دنیا میں ہلچل! ای کامرس کے بادشاہ ایمیزون نے چینی سوشل میڈیا ایپ ٹک ٹاک کو خریدنے کی باقاعدہ پیشکش کر دی ہے۔ ذرائع کے مطابق، ایمیزون نے یہ پیشکش اس وقت دی جب امریکہ میں ٹک ٹاک کی بندش کا خطرہ سر پر منڈلا رہا ہے۔
امریکی حکام کو لکھے گئے خط میں ایمیزون نے واضح کیا ہے کہ وہ ٹک ٹاک کے امریکی آپریشنز خریدنے میں سنجیدہ ہے، لیکن وائٹ ہاؤس نے اس پیشکش کو زیادہ اہمیت نہیں دی۔ دوسری طرف، موبائل ٹیک کمپنی ایپ لووِن نے بھی خریداری کی دوڑ میں شامل ہو کر معاملات کو مزید پیچیدہ بنا دیا ہے۔
یہ سارا معاملہ اس وقت دلچسپ ہوتا جا رہا ہے جب 5 اپریل کی ڈیڈ لائن قریب آ چکی ہے۔ اگر چینی کمپنی بائٹ ڈانس نے امریکی آپریشنز فروخت نہ کیے، تو ٹک ٹاک پر مکمل پابندی لگ سکتی ہے۔
یہ پیشرفت ایسے وقت میں سامنے آئی ہے جب ٹک ٹاک ای کامرس کی دنیا میں بڑا نام بن چکا ہے، اور اس کی مارکیٹ پلیس "ٹک ٹاک شاپ” تیزی سے ترقی کر رہی ہے۔ 17 کروڑ امریکی صارفین رکھنے والی اس ایپ پر ایمیزون کی نظر کوئی معمولی بات نہیں!
کیا ایمیزون کی یہ بولی ٹک ٹاک کو امریکی مارکیٹ میں بچا پائے گی؟ یا پھر یہ مختصر ویڈیوز کا دور امریکہ میں ختم ہونے والا ہے؟ سب کی نظریں اب وائٹ ہاؤس کے فیصلے پر جمی ہوئی ہیں!
