ہوشیار ہو جائیں. پی ٹی اے نے خبردار کردیا

(اردو ایکسپریس) پاکستان ٹیلی کمیونیکیشن اتھارٹی نے سوشل میڈیا صارفین کے لیے ایک اہم انتباہ جاری کیا ہے، پی ٹی اے نے کہا ہے کہ تمام صارفین فوری طور پر اپنے اکاؤنٹس سے غیر قانونی، نفرت انگیز، تہمت آمیز یا گمراہ کن مواد ہٹا دیں تاکہ قانون کی خلاف ورزی سے بچا جا سکے۔ پی ٹی اے نے زور دے کر کہا کہ ذمہ دارانہ ڈیجیٹل رویہ ایک اجتماعی شہری ذمہ داری ہے۔ اتھارٹی نے واضح کیا کہ قومی سالمیت کو نقصان پہنچانے والا، اداروں یا افراد کی عزت و وقار کو مجروح کرنے والا، یا جھوٹی معلومات پھیلانے والا مواد بالکل ناقابل قبول ہے۔پی ٹی اے نے کہا کہ پریوینشن آف الیکٹرونک کرائمز ایکٹ (PECA) 2016 کی سیکشن 20 کے تحت، جان بوجھ کر جھوٹی معلومات پھیلانا جو کسی کی ساکھ یا پرائیویسی کو نقصان پہنچائے، ایک سنگین جرم ہے اور اس پر قانونی کارروائی ہو سکتی ہے۔ کن مواد سے خبردار کیا گیا ہے؟ نفرت انگیز مواد غیر قانونی مواد توہین آمیز یا بدنامی والا مواد گمراہ کن یا جھوٹی معلومات وہ مواد جو قومی سالمیت کو نقصان پہنچائے اداروں یا افراد کی عزت و وقار کو مجروح کرے یہ وارننگ کس تناظر میں جاری کی گئی؟ گذشتہ روزسوشل میڈیا پر ملک بھر میں انٹرنیٹ بند ہونے کے افواہیں پھیلیں جنہیں پی ٹی اے نے بے بنیاد قرار دیا،اتھارٹی نے وضاحت کی کہ یہ صرف معمول کی سب میرین کیبل مینٹیننس تھی اور انٹرنیٹ سروسز مکمل طور پر مستحکم ہیں،اسی تناظر میں جھوٹی معلومات پھیلانے کے خلاف یہ سخت انتباہ جاری کیا گیا ہے۔صارفین کو ہدایت دی گئی ہے کہ وہ فوری طور پر مذکورہ مواد ڈیلیٹ کریں، خلاف ورزی کرنے والوں کے خلاف PECA 2016 کے تحت قانونی کارروائی کی جا سکتی ہے،پی ٹی اے کا مقصد سوشل میڈیا پر ذمہ دارانہ استعمال کو فروغ دینا، ملک کی سالمیت اور اداروں کی عزت، اور افراد کی پرائیویسی کا تحفظ یقینی بنانا ہے۔ پی ٹی اے نے واضح کیا کہ سوشل میڈیا پر آزادی اظہار کے نام پر غیر ذمہ دارانہ رویہ برداشت نہیں کیا جائے گا، صارفین کو مشورہ دیا گیا ہے کہ وہ صرف تصديق شدہ معلومات شیئر کریں اور محتاط رہیں۔