(اُردو ایکسپریس) بالی وڈ کی معروف فلمساز اور کوریوگرافر فرح خان کو ہندو تہوار ہولی سے متعلق متنازع تبصرے کے باعث قانونی مشکلات کا سامنا ہے۔ 20 فروری 2025 کو ٹی وی شو سلیبریٹی ماسٹر شیف میں فرح خان نے ہولی کو "چھپری لوگوں کا تہوار” کہہ کر تنازع کھڑا کر دیا، جس پر ہندو برادری نے سخت ناراضگی کا اظہار کیا۔
یہ بیان سوشل میڈیا پر وائرل ہوتے ہی بڑے پیمانے پر تنقید کا نشانہ بن گیا، اور اسے ہندوؤں کے مذہبی جذبات مجروح کرنے کے مترادف قرار دیا گیا۔ ردعمل کے طور پر، وکاش پھاٹک عرف ہندوستانی بھاؤ نے اپنے وکیل ایڈووکیٹ علی کاشف خان دیش مکھ کے ذریعے ممبئی کے کھار پولیس اسٹیشن میں فرح خان کے خلاف شکایت درج کروائی۔
شکایت کنندہ کے مطابق، یہ تبصرہ نہ صرف ان کے ذاتی اور مذہبی جذبات کو ٹھیس پہنچانے والا ہے بلکہ اس سے فرقہ وارانہ کشیدگی بھی جنم لے سکتی ہے۔ وکیل کا کہنا تھا کہ کسی مقدس تہوار کو "چھپری” جیسے الفاظ سے جوڑنا انتہائی نامناسب ہے۔
فرح خان کے خلاف بھارتی تعزیرات کی دفعہ 196، 299، 302 اور 353 کے تحت مقدمہ درج کر لیا گیا ہے، جو مذہبی جذبات کو ٹھیس پہنچانے اور سماجی ہم آہنگی کو نقصان پہنچانے سے متعلق دفعات پر مشتمل ہیں۔
دوسری جانب، سوشل میڈیا پر بھی معاملے پر ملا جلا ردعمل سامنے آیا ہے۔ کچھ صارفین نے فرح خان کے بیان کو ذات پات کے نظام پر طنز قرار دیا، جبکہ بعض کا کہنا ہے کہ اسے زیادہ سنجیدگی سے نہیں لینا چاہیے کیونکہ یہ محض مذاق تھا۔
تاحال فرح خان یا ان کی قانونی ٹیم کی جانب سے اس معاملے پر کوئی باضابطہ بیان سامنے نہیں آیا۔
