(اُردو ایکسپریس) کراچی کے ایک بڑے سرکاری اسپتال میں افسوسناک واقعہ پیش آیا، جہاں کئی روز سے داخل ایک بچے کی لاش کو اس کے ورثاء اسپتال میں ہی چھوڑ کر فرار ہوگئے۔ اسپتال انتظامیہ کے مطابق، بچہ شدید بیماری کے باعث زیر علاج تھا، تاہم وہ جانبر نہ ہوسکا اور انتقال کرگیا۔
اسپتال ذرائع کا کہنا ہے کہ بچے کے لواحقین نے علاج کے دوران اسپتال کا رخ کرنا کم کر دیا تھا اور جب وہ دم توڑ گیا تو ورثاء لاش کو وصول کرنے کے بجائے خاموشی سے غائب ہوگئے۔ انتظامیہ نے ورثاء سے کئی بار رابطہ کرنے کی کوشش کی، لیکن کوئی جواب موصول نہیں ہوا۔
اسپتال حکام کے مطابق، لاوارث لاش کو قانونی کارروائی مکمل کرنے کے بعد ایدھی سرد خانے کے حوالے کردیا گیا ہے۔ پولیس کا کہنا ہے کہ واقعے کی تحقیقات کی جا رہی ہیں اور بچے کے ورثاء کو تلاش کرنے کی کوشش کی جا رہی ہے۔
یہ افسوسناک واقعہ معاشرتی بے حسی کی عکاسی کرتا ہے، جہاں ایک معصوم کی میت بھی اپنوں کی بے رخی کا شکار ہوگئی۔
