ڈپٹی کمشنر اٹک کہنا ہے کہ اٹک میں ڈھیری کوٹ کے علاقے میں اسکول وین پر فائرنگ فائرنگ کا واقعہ ڈرائیور کی ذاتی دشمنی کے باعث پیش آیا۔اٹک میں ڈھیری کوٹ کے علاقے میں اسکول وین پر فائرنگ سے 2 بچیاں جاں بحق جبکہ 5 بچے اور ڈرائیور زخمی ہوگیا تھا، زخمی بچوں کی عمریں 5 سے 10 سال کے درمیان ہیں۔ڈپٹی کمشنر اٹک کے مطابق اسکول وین پر فائرنگ ڈرائیور کی ذاتی دشمنی کے باعث ہوئی، گزشتہ مہینے اسی دشمنی میں فاریسٹ اہلکار اور اس کا دوست بھی قتل ہوئے تھے۔ڈپٹی کمشنر کا کہنا تھا کہ قتل کا بدلہ لینے کیلئے وین ڈرائیور پر حملہ کیا گیا تھا واقعے میں بچے بھی فائرنگ کی زد میں آگئے۔اٹک میں اسکول وین پر فائرنگ کے واقعے کے بعد صدر اور وزیراعظم نے واقعے کی مذمت کرتے ہوئے کہا تھا کہ بچوں کو نشانہ بنانا شرم ناک فعل ہے ، ذمے داروں کے خلاف سخت کارروائی ہونی چاہیے۔دوسری جانب وزیراعلیٰ پنجاب مریم نواز نے بھی کمشنر راولپنڈی سے واقعے کی رپورٹ طلب کرلی تھی۔