(اُردو ایکسپریس) کیلیفورنیا: شارٹ ویڈیو شیئرنگ ایپلی کیشن ٹک ٹاک نے اپنے صارفین کے لیے نیا فیچر متعارف کرا دیا ہے۔
غیر ملکی خبر رساں ایجنسی کے مطابق ٹک ٹاک کے متعارف کرائے گئے نئے فیچر میں اب ایپ پر وائس نوٹس اور تصاویر یا ویڈیوز بھیجنا ممکن ہو گیا ہے۔
ٹاک ٹاک صارفین 60 سیکنڈ تک کی آواز ریکارڈ کر کے براہِ راست پیغام میں بھیج سکتے ہیں۔
اس کے علاوہ ایک وقت میں 9 تصاویر یا ویڈیوز بھی ایک ساتھ شیئر کی جا سکتی ہیں۔ تصویر چاہے وہ کیمرے سے لی گئی ہوں یا موبائل کی گیلری سے منتخب کی گئی ہوں۔
ٹک ٹاک کے مطابق یہ تبدیلی صرف ویڈیوز دیکھنے اور شیئر کرنے سے آگے بڑھ کر ایپ کو روزمرہ بات چیت کے لیے بھی ایک سہولت بنائے گی۔ بالکل ویسے ہی جیسے واٹس ایپ یا انسٹاگرام پر کیا جاتا ہے۔اپنے صارفین کی حفاظت کے لیے ٹک ٹاک کمپنی نے ایک شرط بھی رکھی ہے۔ کہ اگر کوئی شخص پہلی بار آپ کو پیغام بھیج رہا ہے تو وہ اپنی لی گئی تصویر یا ویڈیو نہیں بھیج سکتا۔ بلکہ صرف ٹک ٹاک پر موجود مواد ہی شیئر کر سکے گا۔
کمپنی کے مطابق یہ سہولت اگلے چند ہفتوں میں تمام صارفین کو دستیاب ہو جائے گی۔
