(اُردو ایکسپریس) وفاقی حکومت نے ہدایت جاری کی ہے کہ تمام بجلی، ٹیلیفون، اور گیس کے بلز پر ڈیجیٹل ادائیگی کو ممکن بنانے کے لیے چھپے ہوئے کیو آر کوڈز کو شامل کیا جائے۔تفصیلات کے مطابق یہ فیصلہ وزیرِاعظم شہباز شریف کی زیر صدارت ایک اجلاس میں کیا گیا ہے۔ سیکرٹری پیٹرولیم اور چیئرمین اوگرا کو ہدایت دی گئی ہے کہ وہ ایک ماہ کے اندر ایسا منصوبہ تیار کریں جس کے تحت ملک بھر کے تمام پیٹرول پمپس پر کیو آر کوڈ، پوائنٹ آف سیل (PoS)، اور سافٹ PoS کے ذریعے ادائیگی کو لازمی بنایا جائے۔
مزید برآں چیئرمین سی ڈی اے (Capital Development Authority) کو موجودہ قوانین کا جائزہ لینے کی ہدایت کی گئی ہے تاکہ تمام یوٹیلیٹیز اور سروسز میں ڈیجیٹل ادائیگی کو لازمی قرار دیا جا سکے۔یاد رہے کہ اسٹیٹ بینک آف پاکستان (SBP) کے لیے ڈیجیٹل ادائیگیوں کے نئے اہداف بھی منظور کر لیے گئے ہیں۔ وزارتِ خزانہ اور اسٹیٹ بینک ڈیجیٹل ادائیگیوں کو فروغ دینے کے لیے سبسڈی کی حد کو 3.5 ارب روپے تک بڑھائیں گے۔ بینکوں کو مرچنٹس سے زیادہ سے زیادہ 0.25 فیصد MDR (مرچنٹ ڈسکاؤنٹ ریٹ) چارج کرنے کی اجازت ہوگی۔ اس سے زیادہ لاگت سروس فراہم کنندگان برداشت کریں گے واضح رہے کہ گورنمنٹ پیمنٹس سب کمیٹی صوبوں سے مشاورت کے بعد نفاذ کے اوقاتِ کار پر نظرِ ثانی کرے گی۔
