جعلی مقدمات کارکنوں اور رہنماؤں کے حوصلے پست نہیں کرسکتے: مشیر اطلاعات کے پی

(اُردو ایکسپریس) لاہور میں پاکستان تحریک انصاف (پی ٹی آئی) کے رہنماؤں اور کارکنان پر مقدمات بنائے جانے پر مشیراطلاعات خیبرپختونخوا بیرسٹر سیف کا ردعمل سامنے آگیا ہے۔مشیر اطلاعات خیبرپختونخوا نے اپنے بیان میں کہا کہ جعلی مقدمات پی ٹی آئی کارکنوں اور رہنماؤں کے حوصلے پست نہیں کرسکتے۔اپنے بیان میں بیرسٹر سیف نے کہا کہ وزیراعلیٰ علی امین گنڈاپور کے خلاف سیاسی مقدمے درج کیے گئے ہیں۔انہوں نے کہا کہ مقدمات کا مقصد پنجاب کے جلسوں میں علی امین کی شرکت روکنا ہے، وہ سیاسی مقدمات کی پرواہ کیے بغیر جلسوں میں بھرپور شرکت کریں گے۔بیرسٹر سیف کا کہنا تھا کہ مریم نواز پنجاب پولیس کا قبلہ درست کریں اور کچے کے ڈاکوؤں پر توجہ دیں۔خیال رہے کہ گزشتہ روز لاہور میں پی ٹی آئی کے جلسے میں شریک تحریک انصاف کے رہنماؤں حماد اظہر، شیخ امتیاز اور عالیہ حمزہ کے خلاف مقدمہ درج کرلیا گیا، مقدمے میں پی ٹی آئی کے 30 سے 40 نامعلوم کارکن بھی ملزم نامزد ہیں۔ایف آئی آر کے مطابق حماد اظہر کی جلسے میں موجودگی کی اطلاع پر پولیس گرفتاری کیلئے گئی،حماد اظہر کو اسٹیج سے نیچے لانے کے دوران شیخ امتیاز اور عالیہ حمزہ نے مزاحمت کی۔ایف آئی آر میں کہا گیا کہ پی ٹی آئی کارکنوں نے پولیس کی وردی پھاڑ دی، ملزمان مزاحمت کرتے ہوئے حماد اظہر کو چھڑوا کر لے گئے۔اس سے قبل وزیراعلیٰ خیبرپختونخوا علی امین گنڈا پور کے خلاف بھی لاہور اور کرک میں مقدمات درج کیے گئے۔علی امین گنڈاپور کیخلاف لاہور کے تھانے تھانا مناواں میں درج مقدمے میں انسداد دہشتگردی ایکٹ، اقدام قتل سمیت 13 دفعات لگائی گئیں۔مقدمے کے متن کے مطابق سیالکوٹ انٹرچینج پر علی امین اسلحہ سے لیس ایک جتھے کی قیادت کررہےتھے، ان کے کہنے پر ٹال پلازہ پرکھڑی گاڑیوں کو آگ لگانے کی کوشش کی گئی اور مسلح جھتے نے اے کے 47 کے ذریعے پولیس مزاحمت بھی کی۔