جو بائیڈن کی دستبرداری کے بعد ڈونلڈ ٹرمپ کا بیان سامنے آگیا

امریکی صدر جو بائیڈن کے صدارتی امیدوار کے منصب سے دستبردار ہونے کے بعد ان کے مخالف امیدوار سابق صدر ڈونلڈ ٹرمپ کا بیان بھی سامنے آ گیا۔امریکی نشریاتی ادارے سی این این سے گفتگو کرتے ہوئے ری پبلیکن صدارتی امیدوار ڈونلڈ ٹرمپ نے جوبائیڈن کی دستبرداری پر لفظی گولہ باری کرتے ہوئے کہا کہ دھوکے باز جوبائیڈن کسی صورت صدارتی امیدوار کا اہل نہیں۔ڈونلڈ ٹرمپ نے جوبائیڈن کو امریکی تاریخ کا سب سے بدترین صدر قرار دیتے ہوئے کہا کہ جوبائیڈن کبھی بھی بطور صدر امریکی قوم کی خدمت کے لائق نہیں تھا، جوبائیڈن جھوٹ اور جعلی خبروں سے اوول آفس تک پہنچا، بائیڈن نے امریکا کو بہت نقصانات پہنچائے ہیں، بائیڈن کی وجہ سے لوگ بغیر چیکنگ سرحد پار کر کے امریکا آ رہے ہیں، ہم بہت جلد بائیڈن کی وجہ سے ہونے والے نقصان کی تلافی کریں گے، آئیں امریکا کو دوبارہ عظیم ترین بنائیں۔